ನಮ್ಮ ದಾವಣಗೆರೆ
ಬೆಂಗಳೂರು, ಆಗಸ್ಟ್ 01 : ಬೆಂಗಳೂರು ನಗರದಲ್ಲಿ ನಡೆದಿದ್ದ ಹೃದಯವಿದ್ರಾಹಕ ಘಟನೆಯೊಂದರಲ್ಲಿ, 13 ವರ್ಷದ ಬಾಲಕನನ್ನು ಅಪಹರಿಸಿ ಬಳಿಕ ಕೊಲೆ ಮಾಡಿ ಶವವನ್ನು ಸುಟ್ಟ ಪ್ರಕರಣದ ಹಿನ್ನೆಲೆ ಈಗ ಇಬ್ಬರು ಆರೋಪಿಗಳನ್ನು ಬೆಂಗಳೂರು ಪೊಲೀಸ್ ತಂಡ ಎನ್ಕೌಂಟರ್ ನಂತರ ಬಂಧಿಸಿದೆ.
Join Whatsapp Group NammaDavangere 04
Join Whatsapp Group NammaDavangere 05
ಘಟನೆ ಹಿನ್ನಲೆ:
ನಿಶ್ಚಿತ್ ಎಂಬ 13 ವರ್ಷದ ಬಾಲಕನು ಕ್ರೈಸ್ಟ್ ಶಾಲೆಯ 8ನೇ ತರಗತಿಯ ವಿದ್ಯಾರ್ಥಿಯಾಗಿದ್ದು, ಬುಧವಾರ (ಜುಲೈ 31) ಸಂಜೆ ಶಾಂತಿನಿಕೇತನ ಲೇಔಟ್ (ಅರಕೆರೆ) ಬಳಿಯ ಟ್ಯೂಷನ್ ಕ್ಲಾಸ್ ಮುಗಿಸಿಕೊಂಡು ಮನೆಗೆ ವಾಪಸ್ ಬರುತ್ತಿದ್ದ ಸಂದರ್ಭದಲ್ಲಿ ಅಪಹರಣಗೊಂಡಿದ್ದನು. ರಾತ್ರಿ 8 ಗಂಟೆ ಯಾದರೂ ಬಾಲಕ ಮನೆಗೆ ಮರಳದ ಹಿನ್ನೆಲೆಯಲ್ಲಿ ತಂದೆ — ಖಾಸಗಿ ಕಾಲೇಜಿನ ಸಹಾ ಪ್ರಾಧ್ಯಾಪಕರಾಗಿರುವವರು — ಹುಲಿಮಾವು ಪೊಲೀಸ್ ಠಾಣೆಯಲ್ಲಿ ಮಗ ನಾಪತ್ತೆ ಎಂಬಂತೆ ದೂರನ್ನು ದಾಖಲಿಸಿದ್ದರು.
ಹಣಕ್ಕಾಗಿ ಬೇಡಿಕೆ – ನಂತರ ಹುಡುಗನ ಶವ ಪತ್ತೆ:
ದೂರು ದಾಖಲಾದ ಕೆಲವೇ ಗಂಟೆಗಳಲ್ಲಿ ಕುಟುಂಬಕ್ಕೆ ಅಪರಿಚಿತರಿಂದ ಕರೆ ಬಂದಿತ್ತು, ಮಗನನ್ನು ಬಿಡುಗಡೆ ಮಾಡಲು ₹5 ಲಕ್ಷ ಹಣ ಕೊಡಬೇಕೆಂದಿದ್ದರು. ಕುಟುಂಬ ಹಣವನ್ನು ನೀಡಲು ಸಿದ್ಧವಿದ್ದರೂ, ಸಮಯಕ್ಕೆ ಮುನ್ನವೇ ದುರ್ಘಟನೆ ನಡೆದಿದೆ.
ಗುರುವಾರ ಸಂಜೆ, ನಿಶ್ಚಿತ್ನ ಶವ ಕಗ್ಗಳಿಪುರಾ ರಸ್ತೆ ಬಳಿಯ ನಿರ್ಜನ ಪ್ರದೇಶದಲ್ಲಿ ಪತ್ತೆಯಾಯಿತು. ಶವ ಸಂಪೂರ್ಣ ಸುಟ್ಟ ಸ್ಥಿತಿಯಲ್ಲಿ ಇದ್ದು, ಪಾದರಕ್ಷೆ ಹಾಗೂ ಉಡುಪುಗಳೂ ಬೆಂಕಿಗೆ ಆಹುತಿಯಾಗಿದ್ದವು. ಆರೋಪಿಗಳು ಬಾಲಕನನ್ನು ಕೊಂದು ಶವ ಸುಟ್ಟಿದ್ದಾರೆ ಎನ್ನಲಾಗಿದೆ.
ಎನ್ಕೌಂಟರ್ ಬಳಿಕ ಬಂಧನ:
ಪೊಲೀಸರು ಪ್ರಕರಣದ ತನಿಖೆ ಕೈಗೆತ್ತಿಕೊಂಡು ತಕ್ಷಣವೇ ಆರೋಪಿಗಳನ್ನು ಪತ್ತೆ ಮಾಡಿ ಆರೋಪಿಗಳನ್ನು ಬಂಧಿಸಲು ಯತ್ನಿಸಿದಾಗ ಅವರು ಹರಿತ ಆಯುಧಗಳಿಂದ ಪೊಲೀಸರಿಗೆ ಪ್ರತಿರೋಧ ತೋರಿದರು. ಎಚ್ಚರಿಕೆಗಾಗಿ ಗಾಳಿಗೆ ಗುಂಡು ಹಾರಿಸಿದರೂ ಆರೋಪಿಗಳು ಬಗ್ಗಲಿಲ್ಲ. ಪರಿಣಾಮವಾಗಿ ಪೊಲೀಸರು ತಮ್ಮ ಆತ್ಮರಕ್ಷಣೆಗಾಗಿ 6 ಗುಂಡುಗಳನ್ನು ಹಾರಿಸಿದರು.
ಈ ಎನ್ಕೌಂಟರ್ನಲ್ಲಿ ಗುರುಮೂರ್ತಿ ಹಾಗೂ ಗೋಪಿಕೃಷ್ಣ ಎಂಬ ಇಬ್ಬರು ಆರೋಪಿಗಳಿಗೆ ತಲಾ ಕಾಲಿಗೆ ಗುಂಡು ತಗುಲಿದ್ದು, ಅವರನ್ನು ತಕ್ಷಣವೇ ಜಯನಗರ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಯಿತು. ನಂತರ ಹೆಚ್ಚಿನ ಚಿಕಿತ್ಸೆಗೆ ವಿಕ್ಟೋರಿಯಾ ಆಸ್ಪತ್ರೆಗೆ ಸ್ಥಳಾಂತರಿಸಲಾಗುತ್ತಿದೆ.
ಪೊಲೀಸ್ ತಂಡ ಶ್ಲಾಘನೆಗೆ ಪಾತ್ರ:
ಈ ಕಾರ್ಯಾಚರಣೆಯನ್ನು ಹುಲಿಮಾವು ಠಾಣೆಯ ಇನ್ಸ್ಪೆಕ್ಟರ್ ಕುಮಾರಸ್ವಾಮಿ ಹಾಗೂ ಪಿಎಸ್ಐ ಅರವಿಂದ ಕುಮಾರ್ ನೇತೃತ್ವದಲ್ಲಿ ನಡೆದಿದ್ದು ಮಕ್ಕಳ ಸುರಕ್ಷತೆಯ ಬಗ್ಗೆ ಸಾರ್ವಜನಿಕರಲ್ಲಿ ಆತಂಕ ಮೂಡಿಸಿದ್ದ ಈ ಪ್ರಕರಣವನ್ನು ಪೊಲೀಸರು ತ್ವರಿತವಾಗಿ ಪತ್ತೆಹಚ್ಚಿ ಆರೋಪಿಗಳನ್ನು ಬಂಧಿಸಿರುವುದು ಶ್ಲಾಘನೀಯ.
ಮತ್ತಷ್ಟು ತನಿಖೆ ಮುಂದುವರೆಯಲಿದೆ:
ಈ ಪ್ರಕರಣದಲ್ಲಿ ಬೇರೆ ಯಾರಾದರೂ ವ್ಯಕ್ತಿಗಳು ಶಾಮೀಲಾಗಿರುವ ಶಂಕೆ ಇದ್ದು ಪೊಲೀಸರು ತನಿಖೆಯನ್ನು ಮುಂದುವರಿಸಿದ್ದಾರೆ.
